Mga Berso

Bayan ay sinalakay

Taong bayan ay hinubaran

mga bibig ay sinugatan

nang ito’y tuluyang di mabuksan

 

nang mukha nila’y aking nasilayan

puso ko’y nadaganan

sila’y 'di taga-labas

o prayle, sundalo 

o mga matang bughaw 

dugong kayumanggi natin 

sa kanila’y nananalaytay

 

Kailan, paano, bakit

ang lahat nang ito nagsimula?

Di kaya’y sa amin lamang ito nagmula?

Ang iba’y labis ang pagsisisi

ang iba’y piniling mabingi

ang iba’y panay ang dasal

at ang iba’y naghihintay ng

himala, nagbabakasakaling …

kayo’y umahon sa inyong kinalilibingan

 

Mahal naming mga bayani,

marahil para sa amin kayo ay lumuluha

at sa bawat tulo’y may isang katanungan

“Ito na ba ang kinahinatnan

ng nakalipas na pakikipaglabanan?”

 

Ako ay labis na naniniwala

na kayo ay hindi namatay

para lamang kami'y malunod

sa dagat ng kamangmangan

ng mga taong dapat sana’y tularan;

sambit noo’y hatid nila ay kinabukasan,

pag-asa, pag-ahon, patungo sa liwanag

ngunit dala pa nila ay kabalintunaan ...

tuluyan nang nabalot ang ating Inang Bayan

ng higit pa sa kadiliman

Maaari niyo ba kaming tulungan?

Halina't sumanib sa aming mga katawan 

ito na ang panibagong pakikipaglaban

armas ang inyong kagitingan at kadakilaan 

 

Ako? Wala akong ibang alam

kundi gamitin ang aking utak at pakikiramdam;

Lakas-loob na makikipagbakbakan

gamit ang mga katagang sigaw ay himagsikan

Kapwa Pilipino, wag na tayong magmaang-maangan pa;

dumilat sa katotohanan!

hanggang kailan natin ipagdiriwang ang kamalian?

Kailan ba magigising ang lahat 

sa isang masamang panaginip 

na tayo rin naman ang lumikha?

Makialam! Magsalita!

Hindi lahat nang sabihin nila ay tama

Ang pumiling hindi makialam

Kailanma'y di magdudulot ng kapayapaan

sa halip ito’y higit na malaking kasalanan

Turuan ang sarili na mahalin ang Inang Bayan

hindi ang mga namumuno na nasa maling daan  

mga taong dahilan ng ating di pag-uunawaan

 

Nasaan ang pag-ibig sa tinubuang lupa

na walang iba ay hihigit pa?

Wala na nga, wala!

Kalayaan, o kalayaan

darating kaya ang araw

na ika’y tunay na masisilayan?

 

 

06.04.20

Pilipinas Kong Mahal