Uski ankhon me [in HINDI language]

Not in DEVANAGARI script.

====Uski ankhon me====
Copyright ©pushkar prabhat, 2014
Nidar, kabhi idhar to kabhi udhar,
Na shak, na hichak
Bus bebaak, malang masti me,
Lehraati, balkhati,
Maine use udte dekha hai.
Chamakti,
Ajey uski ankhon me maine,
Sunhara ek khwab dekha hai.

Bholi bhaali, nasamajh, nadaan,
Duniyadaari se anjaan.
Dil ki sadaa pe,
Sehmi kabhi josh me,
Bina jhuke, bina ruke, duniya bhar se,
Maine use ladte dekha hai.
Masoom,
Nischal uski ankhon me maine,
Pyaar aur bus pyaar dekha hai.

Bebas si kabhi,
Par zindagi se bhari.
Maaf hai use sab,
Nakhre, narajgi, gussa....
Girti sambhalti,
Mujhse pyaar jatati,
Maine use muskuraate dekha hai.
Kaththayi,
Khoobsurat uski ankhon me maine,
Apna aks dekha hai.
__________________________

Reviews

[Rehan Roy]

Ati sundar rachna Kavivar!

[Penny]

Na sirf yeh kavita kisi ladki ke alag alag rupon ko dikhati hai balki mohabbat ke alag makamon ya manzaro ko bhi darshati hai. Bahot khoob!

[Rehan Roy]

Main aapke bhavarth se poorntya sehmat hoon.Maine apna pehla comment delete kar diya tha,jisse sambandhit aapka ye comment hai. Uske liye mujhe kshma karen.