Handum sang Ilo

Sang gamay ko guin hambal sang akon amay kung paano sya naga pulaw bugtaw bantay sa akon para indi ko malamokan sa ti-on nga ga masakit ako, Ini nga tinaga naka marka guid sa akon huna huna, gani daku ang akon respeto sa amay ko. Nagdaku ako nga may pinalangaun nga amay kag iloy hasta sa nagdangat ako sa edad nga nieve anyos. Nakita ko kung pano nagmasakit ang akon iloy, kung paano ang akon amay desperado sa amon kabuhi. Ang iloy ko ang akon inspirasyon, pero sa amo to nga ti-on napa bay-an ko sya tungod sang kahadluk ko nga madula sya sa akon, kag irresponsible ako sa pag-atubang sa amo to nga situwasyon.

Nadumduman ko sang sa siete anyus ako kung pano ko guin pangakuan ang akon iloy sang maayo nga buas damlag kay ma seaman ako.

Nag pangamuyo ako sa Dios tani indi lang madula ang akon iloy, pero wala sa isa ka semana guin-bayaan ya kami.

Ang akun magulang guin hambalan sang iloy ko nga indi nya kami pagpabay-an. Tam-an ka niwang sang akon iloy kag nagatulo ang iya luha samtang ang tingog daw hutik lang nga naga dula-dula tungod guina lagas nya ang iya guinhawa. Isa ka masubo nga aga kami nga mag utod nag hilibion tungod wala na ang amon iloy, ang amon amay wala sa amon balay tungod naga pangita sang amon kalan-un.

Ang akon mata naubosan na sang luha sa amo to nga ti-on, ang kabuhi namon daw galutaw sa hangin nga ang buas isa ka mysteryo nga palaabuton.

Sa amo to nga tuig nag bagyo kag naguba ang amon balay. May ara nga ti-on nga nagkaon kami sang tinanok nga dahon san kamote kag guin sawsaw sa langaw para sa panyaga, Pero sa kalouy sang Dios nagdaku kami nga may paghigugma sa isa kag isa.

Nag lapta kami nga mag utod tungod indi na kasarang ang amon amay mag sakdag sa amon pag eskwela. Ang isa ka manghod ko nga babaye ara sa akon tiya kag ang magulang ko nga babaye nag pa manila. Ako kag sang utod ko nga babaye nga dasun sa akon ang nabilin sa uma.

Nakaga graduate ako sa high school sa kalouy sang Dios, ang handum ko lang maka obra sa Gaisano or sa Lopues Department store, pero may isa ka tsansa nga naka eskwela ako bilang eskolar kag natapos ko ang akon collegio.

Ang akon magulang nga babayi nag obra sa Japan kag guin tuman ang promisa sa akon iloy nga indi kami pabay-an.

Subong ari na ako ga ubra sa banko sa abroad. Kung madumduman ko ang nagligad nga panahon, ang akon iloy kag amay ang akon inspirasyon. Kung diin man ako subong kag kung ano man ang akon pala-abutun, ini tanan nakuha ko tungod sa inspirasyon halin sa akon palanga nga mga hinikanan.

Ang handum ko nalab-ot ko, kag masanag na ang buas damlag sang pamilya ko,tani ari di sya tungod ini tanan para guid sa iya. Ang akon Iloy.