PASTOL

Malimit kang ipagbunyi't ipagdangal ng 'yong kawan
Sinusunod, tinutupad ang lahat mong kautusan;
Madalas mong sinasabing kami'y iyong minamahal
Kaya't lahat ng nais mo'y para sa 'ming kapakanan.

Ginagalang ka ngang lubos, itinuring kang sandigan
Gumagabay, umaakay upang kami'y wag maligaw;
Ngunit ano itong aking nadaramang kahungkagan
Sa pagsunod ko sa iyo'y nagmistula akong mangmang?

Sadyang mahirap tanggapin at masakit sa damdamin
Kung ang iyong ginagawa'y sadyang di mo saloobin;
Kung ako lang ay 'sang tupang walang utak kung ituring
Paano mo masasabing ang nagturo ay magaling?

Tila ikaw yata, pastol, ang siya ngang naliligaw
Ang dapat na umalalay, dapat ngayong alalayan;
Paano mo sasabihing dapat ka pang parangalan
Kung ang kawan na hawak mo sa 'yo ngayo'y nasusuklam?

Author's Note

Everyone has his rebel side. Written year 2004.