KayJe

Written in the Filipino language.

Sana'y puksain ng aba 'kong katapatan

Ang damdaming sa puso ko ay gumimbal

Pagkat ang pag-ibig ay isang larangan

Kung saan ako'y ipinanganak na hangal

At wala pang guro na sa aki'y nagtulak

Na sigaw ng puso ay aking dinggin

Pagkat 'di na lingid sa isang pusong busilak

Na ang tunay na alay ay 'di mapansin

Sa mundong pumapanaw ang 'di matitikas

O tadhana! Saan mo 'ko madadala?

Kung damdamin ay parang kugong nagniningas

Pag ika'y nadarang, ay! Abo na pala!

Kaya't ang dalangin sa tuwina'y payak lang,

Na sa pawang lunos ay huwag na 'kong dalhin

Ng pagsinta 'kong labis ang pagkasalang

Ngunit tago, at maihahalintulad sa hangin.