Atchiramtang

Ka·sinsriksrik ka·sinjrime balwa balbaa,

Mikka tapchi tingtot tingtot wasisibaa,

Bola wa·a samsi samchek tangsim ritima

Tangsekgilgil a·bri a·kong do·mat ilgima.

 

Chidareni timtim gam·an baksa, ringna ringtoa

Bolgrimoni rong·brakoni joka, nina nitoa;

Salan ding·o, gitok ran·o, ringo okna chijima

Asongkam·e rong·patalo rona siksima.

 

A·paloni otchru bang·e jele cha·ama

Koksi kie attamo cha·na kolna re·nama;

Rongma ma·gok ka·sin rim·am name basena,

Rongrukoba, alikoba dongo kolchapbajolna.

 

Wachichake ang·ke rim·o beben an·senga,

Ong·katako, jiraako niokgenba, rim·na altubatkala.

Kari jal·ik kam·chekenba polta tarina,

Dilja da·nang songo dongo me·su samjakna.

 

Gisik ra·a simbraata songna noknaba,

Bu·an bu·du kajia jikke kal·grikakoba.

Ripeng baju mama ada mosa buningna,

Dokgrik su·grik ka·dingako noada jongabina.

Matchu mua, ki·i gala, koksep watako,

Pringni chakate saruknaba aguk tokako.

Batil ra·e chola balbeng gane do·mat goako,

Mandal take gari ga·e jaksi den·gilengako

Singsingata nikpiltaina, atchiramtangko.