Do·patchi

Chonengode nikpaachim chongipa do·ko do·patchi

Bangbang sakko bilwinie ringako mikka bitchi

An·sengata nitoriri bilnapa wengwat wengwatachi

Ta·rakprete bilsengchoke rang·san bilnapachi

‘Chret chret’ mikkoenba ring·ako pangsuni ning·chi.

 

Roachim nokmandeo A·chikrangni nokko

Knatobee sulko sale am·pang ning·o gitko

Kal·grikachim pi·sa ama jajrengangri bitipo

Tom·tomate nokdonggipa mandena on·pae sukko

Ring·a attamango dongdikagri gimaate salni neng·ako.

 

Ka·chaa atchu mikreng nia do·patchiko mangkalana

Ama jaksi jing·jingpae agana, ‘Bisongkode jotrekjana, a·rikjana’

‘Nokku jamku wa·al su·chimpeming katana’, ambi ku·misicha agana

Apa chingko dokna satna am·a ra·chakgija wakilekbeana,

Ina bi·sa denggurangba wa·jareng wa·bibomko dongaldange kata.

 

Aia niat! Menggo mikbugrak donga tom·tom time

Nokking pangsuni on·dimachapak sko rongrengkam·e

Cholko ra·e ku·chi mitap bilsengchokako bik rang·san chikna

Tap bing·sipari niksrapgijakon bilchrokari chikkaprikna

Ku·eng ku·chok chikkape balangaijok da·ning detangna.

 

Gimajachim indiba menggo chikna man·oba,

Mikka balwa bilakkoba bi·sa bitipone ga·akoba,

Bitchi te·rok rongchinggipa maibakai rongtombaoba.

Katangtokjok da·nang do·patchirang dongram turamna

Am·pang wa·jak rotoako sandie, nokking tinko pinana.

 

Da·oni bi·sa di·sadi ma·manjajok do·patchiko

Nikpajajok umangde do·patchini bimangko

Knajaengjok do·patchini ku·rang bewalko

Una bateba, ‘Badike daka?’ ’nesa sinng·a nokmandeko.

Uijaha chadamberang atchu ambin nok jam dongramko.