Oh angjong anurang

Oh angjong anurang:

Oh angjong anurang, rittim gitalrang

Tangsimbae nitobee soksolgiparang,

Chasong gitalni pante me•trarang.

Bimik nadubamiting kambi dubamiting

Jeko jako bingbing bangbang dakna sikmiting

Tapi nina gimikkon gisik ding•chaobamiting.

 

Rudapbone chikone, pulna ka•sin chijime

Rittimba•kan bijakrang to•om to•om so•ome

Balgaochina ching•chet rimmit nina nitoe.

Skibone namako gisik ka•tong dingchike

Sa•ra nokkra rongtale, pringanti ottroke

Noksam nokgil gilkrie-pang•sange.

 

Balgao gital bibalko da•a rim•ekabune,

Sile name balgaokan daktapgija donbone.

Ruram minianade da•a mikbokabone,

Chokgilek bakgilek da•a na•mang dakbone.

Kang•krang chikrang dakako jawa namnikjahane

Nama gunko an•tangna tom•tom donge chimongne.

 

Gadom gitting jambura cha•o breiwbeane

Minmangija komila namen mesengbeane

Tapiljang te•gatchukoba jo•ong dongo galane.

Mikcha ka•saakude da•a dakamkubone

Bilsi kari sokjokko  ra•na dongna man•gene

Chonmitingo da•oan dimbrengako dakbone.