De Apade

De Apade:

Ja·wil jakwil dakari, mikron niwingwangari

Ma·ko mande ra·agri, pana nachil songgagri

Ja·kol ja·gam tokmrangi a·gimikcha sokwini

Ucha i·cha katbrangi dongbu na·di apa rajadi.

 

Buring sammring napgija, ru·at nadi gangija

Mikka bitchi ringpaja, kang·kariba kom·paja

Nokna krong den·gija, wa·ring den·a changgija

Wa·ding chitna sapgija, dongbu skigija apa raja

 

Ding·ol gram chijama, salbimangko chakjama

Jamatdalo tudama, mina samdang pikjama

Dangrok tetrokgijama, a·totna nitimijama

A·ba chiga nikgija, apa cha·na man·genma.

 

Chiring chikol chiabrek,  milsi pi·a wakibrek

Kamna itto mikubrek, ina dokko gingkubrek.

Chima wari abumek, nokko napo kom·tetrek

Jakma jaksi kal·mikmek, di·sa ganda awilek.

 

Den·bo wa·tre wa·tibok, pubo nokma chikrok

Krongna a·kol chu·bujok, bera wa·si su·bujok

Noking wa·jak chekbojok, masu du·mok jilbojok

Cha·ram turam nibojok, nokadamna rikbojok.

 

Re·chaboha dimbrenge, sikelboha da·ode

Ja·man ja·wil intande, sko taru brijokode

Dongmanoa skimbee, tangmanoa mikchi sepe

Apade na·ade nang·ma nang·pa bon·ode

Badike·en daknawa, ma·ringeha dongnawa

Sawa nang·ko ninawa, aratanan galnawa

De apade, bilakaba na·ade, jakminaba kamode,

De apade, nang·na dukko man·a de, de apade.