Kana wandida mukomana

Indeginous shona poem

(Reply to Cde Simbi)

Ndaive ndayaruka hangu chisikana
chivhindikiti
Chigagairwa chakakweva chikaguta.
Pandaigagaira hono makotsi papata ungati mukuyu!
Pandaitsika pasi raindengendeka!
Ganda rangu raive tsito
Asi kununa kuita sedohwe.
Ndaive ndayaruka hangu chimhandara.
Seshana yasasikwa pachoto
Hono dzaindishuvira.
Sehari pahuva chipfuva chaive chakarongedzeka.
Shure ndaiita sendakasenga tswanda mbiri.
Pandayimwaya nyemwerero
Mazino akachena semukaka oti chechetere.
Andida hake mukomana aitosunga dzisimbe.

Zvivindiyi nhai?
hero jaya rekwaSimbi moyo wangu rokumbira.
"Ndipoo shiri"
Chimbichimbi ndokumugachidza
Asi yambiro ndakamupa
"Kana wandida mukomana moyo wangu gumbatira sekacheche".

Sembaura rudo rwakatsva
Ko ndaizivei?
Ndainge ndakapofomadzwa.
Vane godo ndokuti gogogoi.
"Ko Iwe jaya unofirei nenyota makumbo avete mumvura".

Naiyewo aidawo kupakurirwa
Adziya moto wembavha imbavhawo.
Ini ndikati bodo ndakabva kuvanhu.
Makumbo ndokusunga.
Asi chidzidzo ndokukugamuchidza.

Inga vakayambira vakuru zvikanzi midzimu haigachidze kaviri.
Ambi, kokora, zviwitsi raida kuyevedza jaya.
Ini ndikati
Unoti ndakapusasu?
Akuruma nzeve ndewako, ini ndokukama mombe ndakaringa nzira.
Chakazenge chapwa chikwama
Mvura ndikatsengawo ichibuda masese.
Ko humhandara ndiyo ndarama yangu ka.
Pawakadarika nepamana angu chiramu ndaitoitira svoto.
Ndakanzwa woti ndinopuruzira matumbu evakaringa marinda.
Uku uchiti ndakakukweva sechikwekwe.
Kukupedza seshuramatongo.
Rako divi hauna kuridudza
Ndaiti wandida mukomana izvo waida kumoora chete.
Vakuru ndokuti zve kugona mbavha huirongera.
Wasara wapusa sezizi!


By Rutendo Changara
17-04-2020