kasabay

Para sa mga taong naglalakbay sa byahe ng buhay.

Sila. Sila 'yong iba't ibang tao sa buhay.
Mga taong kasama mong naglalakbay.
May uunahan ka at mayrong sasabay.
May titisod sa'yo, mayrong aalalay.
Mayron ding hahawak sa 'yong mga kamay.

May titingnan ka mula ulo hanggang paa.
Mayroong uusig, sasabihing 'di mo kaya.
May hihilahin ka pabalik sa baba.
May mga tatawa 'pag ika'y nadapa.

Mahalaga sila sa bawat hakbang mo.
'Wag kang padadala sa kanilang tukso.
Huwag kang pumayag na ika'y igupo.
Sila'y pagsubok lang na daraanan mo.

Ang s'yang mahalaga sa bawat paghakbang,
Yaong mga taong sa 'yo'y nagmamahal.
'Yong naniniwala sa 'yong kakayahan.
'Yong yayakapin ka't 'di ka huhusgahan.

-genalyn caguimbal-