Tera Khona Zaroori Tha

Ek Azaad Nazm

Tera Khona Zaroori tha,

Mera Hona Zaroori tha

Mere Hone, Na Hone ko, yehi hona zaroori tha,

Tera khona zaroori tha…

 

Wo Teri nok e muzgaan pe larazta, Dolta har dum

Wo tera gham, wo mera ghum

Ke uss dard-e- shanasaayee ka kum hona zaroori tha

Tera khona zaroori tha

 

Who ek jehd-e-musalsal

Mere Maazi ki daldal

Usi daldal mein dhansta aaj, kal aur aik ik pal

To phir Nisyaan ka bhi kuchh to hal hona zaroori tha

Tera Khona zaroori tha

 

Chalo dekhain bichhar kar

Jaron se yoon ukhar kar

Saleeb-e-NaShanasaayee pe charh kar

Magar kia khud se larr kar? Gar yehi hona zarrori tha

Tera kona zarrori tha

Mera Hona zaroori tha

Mera Hona Zaroori tha, Magar kia hosaka main?

Teri Yadon se larkar ek pal bhi sosaka main?

Shanasaayee ke mailon mein hansa kia? Rosaka main?

Tujhay khone chala tha, khud ko kho kar, kho saka main?

To phir kaise kahoon ke jo hua, hona zaroori tha

Mera Hona Zaroori, Haan! Mera Hona Zaroori tha

Magar Kia Iss tarha Se? Kia Tera Khona Zaroori tha?